Siz lütfən qarşınızdakı internet səhifəsi ilə tanış olmaqla Azərbaycan Tibb Universiteti, onun klinikaları, fakültələri, kafedraları, tədris muzeyi, müalicə müəssisələri, Elmi -Tədqiqat Mərkəzi, sağlamlıq guşələri, idman - sağlamlıq kompleksi, tədris binaları, tibbi kitabxanası, yataqxana və məişət xidmətləri, mədəni - kütləvi tədbirləri, istirahət düşərgəsi, diplomaqədərki tibb təhsilinin spesifikası, internet mərkəzi, beynəlxalq əlaqələri və s.haqqında qısa məlumat ala bilərsiniz. Azərbaycan Tibb Universitetinin məzunları müxtəlif illərdə fədakarlıq göstərərək ölkə daxilindəki malyariya, traxoma, polimielit, vərəm və s. bu kimi xəstəliklərin qarşısının alınmasında mühüm rol oynayıblar. Azərbaycan Tibb Universitetinin 1996 - cı ildə Dünya Təhsil Birliyinin Beynəlxalq reyestrinə qoşulması, eləcə də 1998-ci ildə Qara dəniz hövzəsiətrafı ölkələrin Ali Məktəblər Birliyinə, 2000- ci ildə Beynəlxalq Ali Məktəblər Assosiasiyasına, 2002- ci ildə Avropa Universitetlər Assosiasiyasına tamhüquqlu üzv qəbul edilməsi bu təhsil və elm ocağının beynəlxalq aləmdəki nüfuzunu daha da artırmışdır. Dünyanın bir çox görkəmli alimləri Universitetimizlə sıx əlaqə yaratmış, onun «Fəxri doktoru», «Fəxri professoru», «Fəxri Qonağı» seçilmişlər.

Dünya şöhrətli siyasətçi, dahi şəxsiyyət kimi tarixdə əbədiləşən milli lider Heydər Əliyevin ölkəmizin dövlət müstəqilliyi bərpa edildikdən sonra XX əsrin sonlarında -1998 və 2000-ci illərdə iki dəfə Universitetimizdə olması, gələcək həkimlərə dəyərli məsləhətlər verməsi Universitetimizin yeni tarixində mühüm mərhələlərdən birinə çevrilmişdir. Onun səyi nəticəsində 1998 - ci ildə ATU-nun 11 mərtəbəli tədris binası tikilib istifadəyə verilmişdir. Yeni tədris binasında 10 nəzəri kafedra, tibbi kitabxana, «Təbib» nəşriyyatı yerləşdirilib. Binada 500 yerlik geniş akt zalı vardır. Kafedraların bazaları genişləndirilməklə tədris otaqları və laboratoriyalar müasir tələbata cavab verən avdanlıqlarla təchiz edilmişdir. Hal -hazırda əczaçılıq fakültəsində bakalavr və magistrlərin hazırlanması, müalicə -profilaktika, pediatriya, tibbi - profilaktika, tibbi - biologiya, stomatologiya fakültələrində kliniki fənlərdən dərs saatlarının artırılması, tədrisin yenidən qurulması və elmi - tədqiqat işlərinin keyfiyyətinin yaxşılaşdırılması, onların elmi nəticələrinin səhiyyə praktikasına tətbiqi və s. uğurla həyata keçirilir. Qeyd etmək lazımdır ki, ATU - nun tibbi - profilaktika, tibbi - biologiya və stomatologiya fakültələrində artıq Boloniya prosesinin kredit sisteminə keçidi uğurla həyata keçirilir. 2010 - 2011 -ci tədris ilində digər fakültələrdə də təhsilin kredit sistemi ilə tədrisi həyata keçiriləcəkdir. Beləliklə, 2010- cu ildən etibarən ATU - nun bütün fakültələrində tibb təhsili həm forma, həm də məzmun etibarilə Avropa təhsil sisteminə tam uyğunlaşdırılır.

Fərəhli haldır ki, son illərdə ATU-nun maddi - texniki bazası daha da möhkəmləndirilmiş, aparılan islahatlar tibb təhsilinin keyfiyyətinin yaxşılaşdırılması istiqamətində əsaslı dönüş yaratmış, Universitetimizin öz klinikaları fəaliyyət göstərməyə başlamışdır. Belə ki, 2002-ci ildə ümummilli lider Heydər Əliyevin qayğısı sayəsində ATU-nun ilk klinikası olan stomatoloji klinika fəaliyyətə başlamışdır. 2007-ci ildə ölkə Prezidenti cənab İlham Əliyevin yaxından köməyi nəticəsində möhtəşəm onkoloji klinika təşkil edilmişdir. Hər iki klinika ən müasir avadanlıqlarla təchiz edilərək dünya standartlarına uyğun səviyyədə əhaliyə tibbi xidmət göstərir. Bu klinikaların nəzdində ATU-nun müvafiq kafedralarının professor - müəllim heyəti, əməkdaşları tədris - metodik, elmi, müalicə - diaqnostika işləri ilə məşğul olur, yüksəkixtisaslı tibb kadrlarının hazırlanmasında fəal iştirak edirlər. Cənab Prezidentin Sərəncamları ilə 2007- ci və 2008- ci illərdə müvafiq olaraq çoxprofilli terapevtik, eləcə də cərrahiyyə klinikalarının yerləşəcəyi binaların təməli qoyulmuşdur. 14 mərtəbəli terapevtik klinikanın tikintisi artıq başa çatdırılmışdır və 2010-cu ildə ATU- nun yaradılmasının 80 illik yubiley tədbirləri ərəfəsində istifadəyə verilməyə hazırdır. Cərrahiyyə klinikasının da tikintisi yaxın vaxtlarda başa çatdırılacaqdır. Onu da qeyd etmək lazımdır ki, 2010- cu ilin aprel ayının 28- də ölkə Prezidenti zati -aliləri cənab İlham Əliyev ATU-nun yaranmasının 80- illik yubileyinin dövlət səviyyəsində keçirilməsi haqqında Sərəncam imzalamışdır.

2000-ci ildə ATU-da hərbi - tibb fakültəsi, 2006-cı ildə isə Azərbaycandilli və rusdilli qruplarla yanaşı ingilisdilli qruplar da təşkil edilmişdir. Universitetimizdə yerli tələbələrlə yanaşı, dünyanın bir çox xarici ölkələrindən gəlmiş xarici vətəndaşlar da təhsil alır. ATU- da təhsil almağı arzu edənləri Universitetimiz hər zaman böyük məmnuniyyətlə qəbul etməyə hazırdır. ATU- nun tələbə və məzunlarından 116 nəfərdən çox kontingent müxtəlif ixtisaslar üzrə təhsilini xarici ölkələrdə davam etdirir.

Hazırda ATU- nun I və II müalicə - profilaktika, pediatriya, tibbi - profilaktika və tibbi - biologiya, stomatologiya, əczaçılıq, həmçinin hərbi - tibb fakültələrində 7500-dən artıq tələbə təhsil alır. ATU - nun nəzdində inzibati bina, 4 klinika, 6 tədris korpusu, 6 tələbə yataqxanası, bədən tərbiyəsi və idman kompleksi, örtülü üzgüçülük hovuzu, 500 və 200 yerlik akt zalları, bufet və yeməkxanalar, Elmi - Tədqiqat Mərkəzi, Nabrandakı «Təbib» idman - sağlamlıq düşərgəsi, tələbə poliklinikası, mədəni - xidmət qurumları, zəngin tibb kitabxanası, internet mərkəzi və s. vardır.
Sizi bir daha yüksəkixtisaslı tibb kadrları hazırlayan yeganə dövlət ali tibb təhsili müəssisəsi olan və ölkənin ən iri ali məktəblərindən biri kimi fəaliyyət göstərən Azərbaycan Tibb Universitetində səmimiyyətlə salamlayıram.
Azərbaycan Tibb Universitetinin rektoru, Azərbaycan Milli Elmlər Akademiyasının,
Rusiya Federasiyası TEA-nın, Polşa TEA-nın həqiqi üzvü, SSRİ Dövlət
mükafatı laureatı, Əməkdar Elm Xadimi, akademik Əhliman Əmiraslanov