AZ EN
Digər fakultələr
Stomatologiya fakültəsi

Dekanın mesajı – Stomatologiya ixtisası - əhali arasında stomatoloji xəstəliklərin yayılması, etiologiyası, patogenezi qanuna-uyğunluqlarını öyrənməklə, xəstəliklərin müalicə və reabilitasiyasını təmin etmək, stomatoloji xəstəliklərin azalmasına xidmət edən profilaktik tədbirlərin hazırlanmasını təmin və təşkil edir. Bu da əhalinin sağlamlığının qorunması, əmək qabiliyyətinin və həyat keyfiyyətinin yüksəldilməsinə xidmət edir.

 

Tarixi – Azərbaycan Tibb Universitetinin stomatologiya fakültəsi 1954-cü ildə təşkil olunmuşdur. Fakültənin yaranmasında əsas məqsəd Respublika əhalisinin yüksək ixtisaslı həkim stomatoloq kadrları ilə təmin etmək olmuşdur. Yarandığı ilk illərdən Azərbaycanlı tələbələrlə yanaşı stomatologiya fakültəsində MDB ölkələrindən, Suriyadan, İraqdan, Fələstindən, Əfqanıstandan, Pakistandan, Türkiyədən, İrandan və digər ölkələrdən tələbələr təhsil alır.
Stomatologiya fakültəsinin bütün profil kafedraları Universitetin Stomatoloji Klinikasında yerləşir. Stomatoloji Klinika 2002-ci ilin avqust ayından fəaliyyət göstərir. Bu klinika universitetin ilk klinikasıdır. Stomatoloji klinika 4 mərtəbəli (ərazisi 5040 kv.m.), 138 kabinetdən və 3 geniş, manitorlarla təchiz olunmuş mühazirə zalından ibarətdir. Klinika yüksək ixtisaslı həkim-stomatoloq kadrları hazırlamaq məqsədilə tədris və elmi-tədqiqat işlərinin aparılması üçün müasir tələblərə cavab verən baza olmaqla yanaşı əhaliyə yüksək ixtisaslı stomatoloji xidmət göstərir. Stomatoloji klinikada Terapevtik stomatologiya kafedrası, Ortopedik stomatologiya kafedrası, Uşaq stomatologiyası kafedrası, Ağız və üz-çənə cərrahiyyəsi kafedrası, Ümumi stomatologiya kafedrası və Qulaq, burun, boğaz xəstəlikləri kafedrasının bir hissəsi yerləşir. Bundan əlavə klinikanın terapiya şöbəsi, cərrahiyyə şöbəsi, ortopediya şöbəsi, ortodontiya şöbəsi, parodontologiya şöbəsi, implantologiya şöbəsi, rentgen şöbəsi, fizioterapiya kabineti, rentgen diaqnostika-tədris kabineti və diş texniki laboratoriyaları var. Tələbələr üçün müasir avadanlıqlarla təchiz olunmuş “Tədris mərkəzi” istifadəyə verilmişdir.

 

Fakültənin tanıtımı – Stomatologiya fakültəsində 719 tələbə təhsil alır ki, onlardan 235 nəfəri xarici ölkələrin vətəndaşlarıdır. Tələbələrin 530 nəfəri azərbaycan bölməsində, 65 nəfəri rus bölməsində, 124 nəfər ingilis bölməsində təhsil alır. Fakültəni bitirmiş məzunlarımız dünyanın inkişaf etmiş ölkələrində müvəffəqiyyətlə fəaliyyət göstərirlər.
Ümumilikdə stomatologiya fakültəsində 17 elmlər doktoru-professor, 39 dosent, 20 baş müəllim, 56 elmlər namizədi, 27 müəllim, 96 assistent, 48 baş laborant çalışır. Bundan başqa 4 doktorant, 60 rezident təhsilini davam etdirir. 24 nəfər dissertasiya üzərində çalışır.
Stomatologiya fakültəsində 8 kafedra və Təbib idman klubu fəaliyyət göstərir:

1. Terapevtik stomatologiya;

2. Ortopedik stomatologiya;

3. Ağız və üz-çənə jərrahiyyəsi;

4. Uşaq stomatologiyası;

5. Ümumi stomatologiya;

6. Qulaq, burun, boğaz xəstəlikləri;

7. Orerativ jərrahlıq və topoqrafik anatomiya;

8. Xarici dillər kafedraları.


İxtisaslar üzrə tələbələr Təhsil Nazirliyi tərəfindən təsdiq edilmiş «Dövlət Təhsil Standartlarına» uyğun olaraq müvafiq kredit sisteminə uyğunlaşdırılmış tədris planı və fənn proqramları əsasında həyata keçirilir.
Fakültədə tədrisin təşkili bütün kurslarda kredit sistemi üzrə aparılır və həftəlik dərs yükü 30 saat təşkil edir. Hər semestrdə tələbələrə 30 kredit müəyyənləşdirilir. Hər bir tələbənin fərdi tədris planı və onların bu planın tərtibində iştirakı, təhsil prosesində xüsusəndə seçim fənnlərində müstəqilliyi təmin olunur. Tədris prosesində tələbələr tyutorun köməyindən istifadə edirlər.
Fakultə Elmi Şurasının tərkibi 21 nəfərdən ibarətdir (11 nəfər professor, 7 nəfər dosent, 2 nəfər assistent və 1 nəfər tələbə). Fakultənin fəaliyyətinə onun Elmi Şurası və sədri – dekan rəhbərlik edir. İş planı fakultənin fəaliyyətini əks etdirən bütün məsələləri əhatə edir.

Copyright © 2013-2015. Azərbaycan Tibb Universiteti! Bütün hüquqlar qorunur.