AZ EN
Digər fakultələr
II Müalicə-profilaktika fakültəsi

Fakültədə «müalicə işi» ixtisası üzrə həkim kadrları hazırlanır. I-III kurslarda təbabətin təməl fənnləri öyrənilir. IV-VI kurslarda isə klinik fənnlər tədris olunur. Diplomaqədərki dövrdə təhsildə fərqlənən tələbələr bir sıra ölkələrin (Türkiyə, Almaniya, ABŞ, Bolqarıstan, Rumıniya, İtaliya və s.) qabaqcıl Universitetlərində təcrübə keçmək imkanına malikdirlər.
Fakültənin istedadlı tələbələri tədrislə yanaşı Universitet Tələbə Elmi Cəmiyyətlərində təbabətin aktual problemlərinə dair elmi-tədqiqat işlərində çalışırlar.
II Müalicə-profilaktika fakültəsinin nəzdində 15 kafedra və 1 kurs fəaliyyət göstərir. Onlardan 3-ü nəzəri, 13-ü klinik kafedralardır. Kafedralarda tədrislə yanaşı təbabətin müxtəlif problemləri və onların həlli yollarının araşdırılması istiqamətində elmi-tədqiqat işləri də aparılır.
Fakültədə təməl fənnlərin tədrisi Univenrsitetin əsas tədris bazasında, klinik fənnlər Universitetin Onkoloji, Stomatoloji, Tədris-terapevtik və Tədris-cərrahiyyə klinikalarında, Bakı şəhərinin əsas klinika və poliklinikalarında və müasir müalicə-diaqnostika avadanlıqları ilə təchiz edilmiş Elmi-Tədqiqat Kardiologiya, Elmi-Tədqiqat Pediatriya, Milli Profilaktika və Tibbi Bərpa İnstitutlarının və akad. M.Topçubaşov ad. Elmi Cərrahiyyə Mərkəzinin bazalarında həyata keçirilir.
Müalicə işi ixtisasını bitirən məzunlar rezidenturada təhsil alaraq anestezioloq-reanimatoloq, ümumi cərrah, neyrocərrah, plastik cərrah, ürək-damar cərrahı, travmatoloq-ortoped, otorinolorinqoloq, oftalmoloq, mama-ginekoloq, uroloq, terapevt, kardioloq, nefroloq, qastroenteroloq, hematoloq, dermatoveneroloq, revmatoloq, endokrinoloq, infeksionist, nevropatoloq, psixiatr, narkoloq, ftiziatr, immunoloq, allerqoloq, fizioterapevt, şüa diaqnostikası, mikrobioloq, patoloqanatom, məhkəmə-tibb eksperti və genetika ixtisaslarına yiyələnə bilərlər. Eyni zamanda rezidentura səviyyəsində hazırlıq keçmək iddiasında olmayan və rezidenturaya qəbul olunmayan məzunlar baza ali tibb təhsili əsasında Səhiyyə Nazirliyinin tibb müəssisələrində sahə həkimi - terapevt, herontoloq, dietoloq, həkim-laborant, immunoloq, infeksionist, ailə həkimi, mikrobioloq, virusoloq, ftiziatr, psixiatr, narkoloq, fizioterapevt, həkim-statistik, həkim-metodist, müalicəvi bədən tərbiyəsi üzrə həkim, təcili və təxirəsalınmaz tibbi yardım üzrə həkim fəaliyyəti ilə məşğul ola bilərlər.
Fakültənin professor-müəllim heyəti: 1 akademik, 2 AMEA-nın müxbir üzvü, 30 elmlər doktoru - professor, 86 elmlər namizədi - dosent, 77 elmlər namizədi - assistent, 80 assistent, 16 - baş müəllim, 1 polkovnik.
Təhsil alanlar: 1824 tələbə, o cümlədən 207 xarici ölkə vətəndaşı, 3 doktorant, 12 dissertant.

Copyright © 2013-2015. Azərbaycan Tibb Universiteti! Bütün hüquqlar qorunur.